Author: Rabing
•1:24 PG
Selamat bertemu baru ngagai bala kita ti bisi nemuai ngagai blog aku, tu meh keterubah iya aku ayan baru pengudah ka 2 bulan enda nyengguk kitu. Sekali tu aku deka mai kita bekungsi siti artikel ti di copy aku ari portal iban iya Ruaikitai.com, sebedau nya aku meri besai terima kasih ka Aya Kumpang Pali ti ngemendar ka aku nyalin artikel tu ba blog aku sekali tu. Cukup manah utai ti ditulis iya ba artikel nya, cerita dalam artikel nya tau nyadi ka teladan kitai sebuat baik ba urang ti agi empai belaki bebini tauka udah bisi ruang bilik. Bah aram meh kitai maca iya.
Tajuk asal artikel tu * Untung jadi enggau indu mereti *, tang aku deka nambah mimit tauka mungkar tajuk iya lalu ngambi ka tu nyadi tajuk ba blog aku. * Pemanah budi basa berega agi ari intan permata. *

Selamat betemu baru enggau bala kitai aba ekc.com ke sekali tu. Lama amat aku udah enda enggau kita berandau laban ke mayuh pengawa. Taja pia, sehari enda nudukka diri betunga enggau kitai ati empai tentu lantang. Laban tikai ruai cyber kitai seruran dianchau ngambika bisi alai kitai bejuraika mayuh macham utai ke tau pulaika pemanah enggau pemansang bansa kitai.
Ke sekali tu aku deka bekenangka berita ke ditusi Aya Thomas Tegong Laka ari Wai.fm, iya nya “program nemu kita” dikeluarka tiap pagi hari Lima jam 7:30 pagi. Enti enda salah ingat aku, dalam pun bulan Sembilan iya bisi bekunsi cherita ngenang siti ruang bilik kaban baru ke enggau iya bekelala di Bintulu sekumbang iya ke gawa sementara aba Bintulu.fm dakam bulan Lapan taun siti nyin kemari.

Paginya iya ngading pengidup ruang bilik siti ke likun sereta entap. Pengidup melaki-bini tu dipeda iya lain jelah ari pengidup bini-laki ke bukai. Laban jarang ke meda pengidup laki bini ke baka tu, nya nyadika siti buah randau dipansutka aba churung radio. Nitihka berita ke temu aku, laki iya gawa nyadi pemesai aba bank ke pengambis besai di Malaysia ngembuan pelajar ke numbas iya peninggi. Bini iya semina nyadi suri-rumah, tang laban anak nyau udah besai nadai agi dijaga bini iya muka kedai makai.
Mayuh utai ke ngasuh alit ati aba ruang bilik seduai tu. Bepun ari ruang bilik diri, ngagai orang ke enggau begulai enggau seduai bebekulu-kili baikka aba luar tauka aba endur laki iya bekereja. Nitihka penerang tu, laki iya taja ngembuan pelajar tinggi bepangkat besai tang ngembuan penemu ti baruh, nemu ngemai diri, enda sumbong, enda ngerigang diri, ngembuan displin ti tinggi, nadai dipeda kitai enggau orang betikika pub tauka karaoke, nadai dipeda sebelah kelang sabung jauh ke ngirup. Taja pia, iya ka amat berandau, begulai enggau orang sereta meri buah penemu nunjukka jalai pengidup.

Bini iya pen baka nya, taja laki tinggi iya pelajar, besai gaji sereta mangku pengawa ti manah tang iya enda sumbong baka indu bukai. Iya enda ninggika diri sereta ngembuan adat basa ti chukup ukai semina enggau laki, anak tang mega enggau semua orang ke begulai sejalai enggau seduai iya.Nya mih kebuah seduai bini laki selalu dikerinduka orang mayuh.
Nama kebuah bini iya nerima gelar Kumang Labuh ari Langit? Gelar Kumang ukai semina dipeda ari pemajik gamal tang ari semua pengawa nadai ke timpang. Taja gamal bini iya enda bangat bajik, jelan iya indu kitai dibaruh hari tu tang adat enggau basa iya nadai endur nyema. Kebuah aku nemu, laban nyau udah bekelala enggau seduai iya. Aku enda nemu agi ka becherita enggai ke dikumbai kita ngelangkung pengidup seduai iya.

Selalu kita meda pengawa bini nyambut tauka ngintu laki semina lakunan aja aba TV. Tang tu kisah nyata dipeda mata kami duai indai tuai aku empu. Kadang-kadang aku nyebut tu aba bini aku, bini aku enda lantang ati, “Ni kami alah ngelayan nuan baka bini sanu nya,” pia ku bini aku. Taja pia sekumbang ke udah meda ulah enggau perangai bini unggal tu (ka pen enda ngunggal ka iya), bini aku bisi berubah mimit ari segi ngutun ruang bilik kami duai.

Munyi ku Dr. Charlie ke nyebut aba program peransang Apai-Indai nembiak, “Ka nyebut aku pedis mulut, ka bejaku aku pedis kuyo” enda nemu ngeratan pengidup seduai melaki-bini iya. Enti baka Aya Thomas pama ga nih! Nemu nusoi ke kita enggau serurun tentang pengidup seduai iya ti ngasuh aku temegah amat ati. Aku amat temegah ati (envy) ukai ninding tauka cemburu (jaku baru diatu) meda gaya enggau pengidup seduai iya. Patut dih! Ruang bilik seduai berekat amat enti dibandingka enggi diri empu. Tang terus terang aku nyebut ditu, anang nyamai ati kita ke indu au! Ka nadai-nadai indu bansa kitai ulih nitihka pengawa bini unggal tu.

Kenu ku unggal aku tu, belabuh ari pagi sampai lemai, ari petang sampai siang, hari besilih minggu, minggu besilih bulan, bulan besilih taun, diatu seduai udah jadi melaki bini masuk ke enambelas taun empai kala besengki jaku, ngasuh pengerindu seduai makin betambah. Kerebak tawas, dani pagi lebuh kaban aku tu ka merus ngeli, ubat ngeli udah dipalitka aba berus iya. Udah tembu mandi, gari semua udah sedia angka ngena angkat masuk.

Munyi ku aya Thomas, enda pecahay kita laban enda meda. Lebuh maya kami begulai bejalai enggau pangan diri, mata aku empu meda iya masukka baju, masukka setukin, nyugu bok, nanchang tali necktie sereta masukka kasut laki iya. Maya kami makai, dudi orang bukai dilayan iya, dulu iya ngambika laki iya. Enti maya makai ikan iya nulangka laki iya. Dirumah nadai orang gaji, tang mih rumah seduai chukup beresi chukup likun dipeda mata enda baka enggi sekeda bala kitai. Enggi sekeda baka kitai, gari betabur aja sebelah geladak melempai atas kerusi.

Dibilik mandi enggi kitai, gari basah tanchut chawat bechemami aja nyau betemera kin-kitu. Nya aku madah ngagai bini aku ngasuh iya enchelahka mata ngambi meda gaya enggau pengidup ruang bilik unggal tu. Di belakang rumah dini bisi tanah kosong, sigi ditanamka enggau sayur, serai, lengkuas, kechala, bungkang ngicha ke enda meli, nyenyadika duit kena tuition anak sekula pia ku seduai iya, laban beratka anak ti besekula.

Aku ukai manding enda, aba ruang bilik diri empu jauh jakunya. Laban bini enggai kamah jari, enggai ke chat kukut luntor. Kelimpah ari nemu ngatur pengelikun ruang bilik sereta begulai enggau orang kulu-kili, seduai melaki bini pandai amat ngatur penatai pemisi enda meli utai sengapa aba enggi kitai. Sekali kami duai indai tuai nguluka iya meli barang pemakai aba kedai, laban laki iya bejalai ngereja pengawa tauka travelling seminggu. Iya meli utai ukai sebarang, sesen dua mudah pen mayuh beda ku iya. Enti kitai berate amat ga jaku iya, telu manuk sema jaku bida 20 sen sebulan kitai jimat 20 sen, setaun kitai jimat RM2.40 sepuluh taun kitai jimat RM24.00. Pia mega enggau barang bukai, baka sabun, shampoo ubat ngeli enggau belanja pemakai ke bukai ku iya. Enti gumpul semua iya ulih bejimat sampai RM300.00 setaun.

Kitai nadai kala datai ditu runding, semina nemu muai aja enda nemu ngenyadi ngiga utai mudah utai gerah aja. Kitai kereja bebendar ngiga belanja, Cina bebendar ngitung duit ari kitai. Bepikir mih dulu sebedau ngereja pengawa.
|
This entry was posted on 1:24 PG and is filed under . You can follow any responses to this entry through the RSS 2.0 feed. You can leave a response, or trackback from your own site.