Author: Rabing
•9:40 PTG
KUCHING: Haribulan 5 Disember hari penuh sejarah bala Iban Remun di Sarawak, kelebih agi di Serian laban nya meh hari pengada Serakup Iban Remun Serian tauka Serian Iban Remun Association (Sira) ke direjista ba haribulan nya baruh Akta Gerempung 1966 enggau Tusun Atur Gerempung 1984.
Mayuh kitai di Sarawak enda kala ninga raban bansa ke dikumbai Iban Remun laban raban bansa sida tu semina bisi ba pelilih Serian aja sereta entara menua Lebor enggau Balai Ringin.
“Nya kebuah kami enda ngena nama Serakup Iban Remun Sarawak, laban bansa kami tu ditemu di Serian aja,” ku Jimali Sunang ke megai pengawa nyadi sekiteri Sira.
Jimali siku pengajar ke bisi Masters degree madah batang tuju sida numbuh Sira nya kena ngangkat sereta nyungkakka pemanah tikas pelajar sekula, sosio-ekonomi sereta main enggau adat asal bansa Iban Remun.
“Kami mega ngarapka ulih ngena Sira nambah toleransi sereta kerejasama entara bala sereta raban bansa bukai ngena sekeda program enggau pengawa rama ngichaka semua tu sama pulai ngagai pemansang bala Sira ngambi pulaika pemanah enggau pemansang semua raban bansa Malaysia,” ku Jimali ke kala megai pengawa nyadi pemesai ba opis pelajar Sarawak.
Lebuh betemu enggau Berita Iban, Jimali ke ngambi latih nyadi pengajar ba MPR dalam taun 1980 suba sereta diatu tengan nembuka tesis PhD iya, madah penumbuh Sira dipejadi Menteri Pemansang Sosial enggau Urbanisasi Dato Sri William Mawan di Serian kena hari Enam 25 April 2009 tu tadi. Indu opis sida ba Lot 560, Kampung Remun, 94700 Serian. Sebarang sapa ti bisi utai tanya, tau talipaun ngagai lumur 082-895807.
Komiti pemungkal Sira tu betuaika Eli Luntai nyadi chermin. Eli, siku pengajar bisi degree, dibantu timbal chermin Gahan Bawin, Jimali nyadi sekiteri, Mikan Spa (timbal sekiteri), Uden @ Sandin Sanggai (tukang wang) sereta enggau Riman Jalen (sapit tukang wang). Bala kaban komiti ke bukai nya nyengkaum Albert Moni Igang, Jimbat Dila, Kapi Singgeh, Bindan Nyarai, Ungkan Mangku enggau Empati Ningkan.
“Diatu bala ke udah ngerejista diri nyadi kaban Sira nya bisi urung 3,000 iku. Semua bala Iban Remun di serata Sarawak tu diatu bisi 15,000 iku nyengkaum 9,000 iku ke udah chukup umur ngundi. Amat meh bansa kami tu betabur sekayu Sarawak tu, tang tebal agi nya endang diau ba 27 buah kampung ke mungkur menua entara Lebor enggau Balai Ringin,” ku Jimali.
Bisi 27 buah kampung ke diwuan bansa Iban Remun di Serian nya nyengkaum Kampung Lebor, Remun, Triboh, Blimbin A, Blimbin B, Semukoi Empagang, Semukoi A, Semukoi B, Liun, Kersik, Serawak, Kerupok, Engkabang A, Engkabang B, Meboi, Junggo Mawang, Batu Kudi, Bayor, Tepin, Sepan, Tanah Mawang, Menyan, Bunut Tanah Mawang, Krangan Trusan, Krangan Tekalong, Krangan Engkatak enggau Kampung Antayan Baru.
Iya mega madah, laban mayuh bendar bansa Iban Remun tu betampi jadi enggau bansa bukai di menua tu kelebih agi baka enggau bala Iban Sebuyau enggau Iban Balau, nya alai patut bendar bala sida numbuhka Sira kena terus ngetanka adat enggau main asal serata jaku sida ke bisi nyelaie mimit ari enggi Iban bukai.
Lebuh ditanya silik agi pasal sejarah asal bansa enggau penatai Iban Remun, Jimali lalu beguai mantai program bejadika penumbuh Sira tu tadi.
Nitihka bup program nya, dalam tengan abad ke-16, sekeda ari raban Iban (Iban Remun, Iban Sebuyau, Iban Balau) angkat pindah ari Batang Kapuas di Kalimantan Barat begigaka menua ke agi jerung endur berumpang berimba, bumai betaun, ngasu beburu.
Bala Iban Remun tu mudik Labuyan ngagai Batang Ai lalu diau ba Lubuk Baya Tapang Peraja. Udah berapa taun sida iya lalu ngili Batang Ai lalu diau ba Bukit Temudok ke disebut Sri Aman diatu lalu di Temudok betuaika Beh enggau Banteh.
Ari Temudok sida lalu pindah nuju kaki Bukit Kelingkang lalu datai ba Sungai Krang ulu Sungai Sadong. Angkat sida ari Sungai Krang lalu bejalai sereta datai ba rumah panjai ba Tembawai Munggang.
Berapa taun udah nya datai dua iku tuai penama Kekai seduai Engkabi ke lalu lalu diau enggau sida iya dia. Udah nya Beh seduai Banteh bisi laya enggau Kekai seduai Engkabi ketegal enda sama penemu.
Kekai seduai Engkabi lalu berunding deka ngiga menua baru. Betuaika Kekai seduai Engkabi bala Iban Remun tu lalu pindah ke Nanga Kedup lalu betemu enggau Damu seduai Panjang ke udah lama datai ba menua nya.
Bala sida Kekai enggau Engkabi lalu bejalai baru nuju Bukit Semuja. Datai dia, sida bisi ninga munyi ai wuong ke disebut Pancho Asu ba ulu Sungai Remun endur sida bepalan. Ari nya sida iya bejalai niki Bukit Remun lalu datai ba endur ke dikumbai Selapak, endur Durian Madu ke diatu.
Udah nya, sida lalu ngulu Sungai Krang datai ba Nanga Sungai Engkuan lalu mudik datai ba Nanga Sungai Remun. Datai ba siti kaki bukit, dia sida bisi ninga munyi burung rauh-rauh ngangau ‘Remun! Remun! Remun!’ ba puchuk kayu. Nya alai kayu nya lalu disebut Kayu Remun, lalu bukit nya dikumbai Bukit Remun enggau sungai mega dikumbai Sungai Remun.
Nyadi Kekai seduai Engkabi tu udah nya bisi bejalai baru ngagai menua ke disebut Samarahan diatu. Lebuh pulai ari Samarahan, dia deh Kekai sakit lalu parai sereta ditumbak ba bukit semak pasar Serian lalu bukit nya disebut Bukit Kekai. Diatu, bala Iban Remun di Serian diau sebelah menua entara Lebor enggau Balai Ringin mungkur 27 buah kampung.
Lebuh ditanya pengamat tulis ba The Borneo Post ke madah dua iku ari orang tebilang penyanyi Jerry Kamit enggau champian bebukut (boxing) Sapok Biki ke dipadah surat berita nya ari bansa Remun, Jimali seduai Eli bela sama madah sama tekenyit ninga nama Sapok laban madah iya ukai siku ari raban bansa nya. Seduai sama madah, Jerry nya baru amat ari bansa Remun.
Berita Iban ngarapka Sira tu mujur. Pengarang nemu bala sida orang ke bagas gawa baka Eli seduai Jimali sebagi ari tanda pemujur bansa Iban Remun. Pengarang ke nyadi pengajar seduai ba MPR dalam 1980 suba gaga bendar ati meda seduai sama mujur bulih degree nyadi pengajar.



P/S..minta ampun ngagai En. Jimali..laban copy paste artikel tu tanpa izin ari iya..kebuah iya aku ngopi artikel tu laban , awak ka bisi bala raban rk.com, radiokitai.com, rumahpanjai. com enggau bala pangan ari facebook aku ulih ngelala bangsa kitai sema sida bisi nemuai ngagai blog Indu Iban Remun tu.
Gambar hiasan aja: Gambar tu dia ambi maya ngintu Gawai Dayak ba kampung Tun Abdul Razak@ Triboh